සීතල දුරුත්ත

අළුත් අවුරුද්දක් ඇරඹුණා. කාර්යාලයේ බොහෝ දෙනෙක් අළුත් ඇඳුම් වලින් සැරසිලා පළමු දිනයේ වැඩට ආවා. කැවුම් කිරිබත් මේසයක් ඇරලා තිබුණා. අළුත් වැඩක් ආරම්භ කරන කොට කිරිබත් උයන චාරිත්‍ර දැන් දැන් ටික අමතක වී ගෙන යනවා. ඒත් පරන පුරුදු කම් හන්දා ලුණු මිරිසක් සමග කිරිබත් කෑල්ලක් දැක්කහම නොකා බැරි වෙනවා. ඒත් ලුණු මිරිසක් නම් රතුලූනු සමග උම්බලකඩ යොදා දෙහි මිරිකා හදා ගත්ත එකක් නොවුනොත් එහි රසයක් නැහැ. බෙහෝවිට හම්බවෙන්නේ මේවාට අදේශක යොදා සකස් කරගත් ලුණුමිරිස්. අනුරාධපුරයේ රාජකාරී කරපු කාලයේ නම් ජනවාරියේ වැඩ පටන් ගන්න කළින් උඩමළුවට ගිහින් සිරිමාබෝධීන් වහන්සේ වන්දනා කරළා එන එක සිරිතක්. මේ හැම එකකින්ම බළාපොරොත්තු වන්නේ අළුත් සහ හොඳ පුරුදුඑක් කර ගැනීමත් නරක පුරුදු ඇත්නම් ඒවා ඉවත දැමීමත්. ඒත් ඒ හැඟීම පවත්වාගෙන යාම අමාරුයි. ඉක්මනින් පරන පුරුදු වලට නැවත එන ප්‍රවනතාව වැඩියි.

පසුගිය දිනවල කිහිප වතාවක් කුලියාපිටියට යන්න සිදුවුණා. මීට පෙර කිහිපවතාවක් රාජකාරී සදහා කුලියාපිටියට යන්න ලැබුණා. ඒත් කුලියාපිටිය අවට සිටි පාසල් මිත්‍රයින් හමු වන්නට ලැබුණේ මේ වතාවේ. සමහරෙක් හමුවුණේ දශක දෙකකට වඩා පස්සේ. කුලියාපිටියේ, සඳලංකාවේ, කොටදෙනියාවේ ගිරිඋල්ල ආදී ගම් නගර වලින් ආපු සෑහෙන සිසුන් පිරිසක් නේවාසිකාගාරයේ සිටියා. වියලි කලාපය අද්දර පිහිටි කුලියාපිටියේ ප්‍රධාන ආර්ථික කටයුත්තක් ලෙස පොල් වගාව හඳුන්වන්නට පුළුවන්. සෑහෙන කාලයකින් වැසි වැටී නොමැති හන්දා පොල් පලදාව අඩුවී ඇති බව කියවුණා. ලංකාවේ මුල්ම ශිෂ්ඨාචාර ආරම්භයක් ලෙස සැලකෙන පඬුවස් නුවර ඇත්තේත් මෙම ප්‍රෙද්ශයට ආසන්නව.

මේ දිනවල උදෑසන දැඩි ශීතලක් සහ මීදුම පවතිනවා. නුවරඑළියේ උෂ්නත්වය +4 ක් වූ බව සහ තුහින වැටුනු බව අද වාර්තා වුණා. පසුගිය සතියේ මට කතා කරපු යුක්රේනයේ සිටින හිතමිත්‍රෙයක් කීවේ ශීත කාලය වුනත් හිම වැටී නැති බව සහ වැස්ස වැටීම නිසා පරිසරයම මඩවී ඇති බව. ශීත සෘතුව ඉවර වෙලා වසන්තය පටන් ගන්න විට එවැනි වටපිටාවක් ඇති වුණු අවස්ථා මතකයේ තියෙනවා. ශීත සෘතුවක් නම් හිම වැටෙන්නේ නැත්නම් අධික ශීතලක් නැත්නම් එය නියම ශීත කාලයක් වන්නේ නැහැ. උත්තර අර්ධ ගෝලයේ නම් අළුත් අවුරුද්දි ශීත සෘතුවයි එකට බැඳී බවතින්නේ. ඇමෙරිකාවේ උෂ්නත්වය වාර්තාගත ලෙස ඉතා පහල ගොස් ඇති බව ප්‍රවෘත්ති වල කියනු ඇසුනා.